Amrywiaeth, Tegwch a Chynhwysiant:
Mae amrywiaeth, tegwch a chynhwysiant yn gysyniadau cydgysylltiedig sy’n anelu at wella diwylliant y gweithle a chanlyniadau i wahanol bobl. Mae amrywiaeth yn cynnwys gweithlu sy’n cynrychioli cymysgedd o gefndiroedd, hunaniaethau, safbwyntiau a phrofiadau. Mae cynhwysiant yn meithrin amgylchedd gwaith lle mae pawb yn teimlo eu bod yn cael eu gwerthfawrogi, eu parchu a’u cynnwys. Mae tegwch yn sicrhau triniaeth deg, mynediad, cyfle a datblygiad i bawb, gan nodi a dileu rhwystrau sydd wedi rhwystro cyfranogiad llawn rhai grwpiau.
Cefndir economaidd-gymdeithasol:
Mae cefndir economaidd-gymdeithasol yn cyfeirio at statws cymdeithasol ac economaidd person neu deulu, wedi’i ffurfio gan ffactorau megis lefel incwm, addysg, galwedigaeth, a mynediad at adnoddau. Gall ddylanwadu ar gyfleoedd a phrofiadau, gan gynnwys mynediad i addysg, gofal iechyd, a rhagolygon gyrfa.
Croestoriadedd:
Mae croestoriadedd yn cyfeirio at natur gydgysylltiedig gwahanol agweddau ar hunaniaeth unigolyn, megis hil, rhyw, rhywioldeb ac anabledd. Mae’n cydnabod sut y gall y ffactorau hyn groestorri a siapio profiadau a heriau unigolyn.
Cydraddoldeb ac Amrywiaeth:
Mae cydraddoldeb ac amrywiaeth yn cwmpasu’r rhwymedigaeth gyfreithiol i hyrwyddo tegwch, triniaeth gyfartal, a pharch at bawb yn y gweithle ac mewn addysg uwch. Mae’n sicrhau bod unigolion yn cael eu trin yn deg, waeth beth fo’u cefndir.
Cyflogadwyedd:
Mae cyflogadwyedd yn cyfeirio at y sgiliau, y wybodaeth, a’r profiad sydd eu hangen ar bobl i sicrhau a chynnal cyflogaeth yn llwyddiannus. Mae’n cynnwys sgiliau technegol swydd-benodol a sgiliau trosglwyddadwy sy’n werthfawr ar draws gyrfaoedd amrywiol.
Datblygu Gyrfa:
Mae datblygu gyrfa yn cynnwys y broses o gaffael a gwella sgiliau, gwybodaeth a phrofiad i symud eich gyrfa yn ei blaen. Mae’n cwmpasu gweithgareddau fel hyfforddiant, rhwydweithio, a chael profiad gwaith perthnasol.
Dysgu Seiliedig ar Waith:
Mae dysgu seiliedig ar waith yn cyfeirio at ddysgu sy’n digwydd yn y gweithle, gan gynnwys hyfforddiant yn y gwaith, interniaethau, neu leoliadau gwaith. Mae’n darparu profiad ymarferol ac yn gwella sgiliau cyflogadwyedd.
Entrepreneuriaeth:
Mae entrepreneuriaeth yn golygu dechrau a rhedeg eich busnes eich hun. Mae entrepreneuriaid yn arloesi, yn cymryd risgiau, ac yn creu nwyddau neu wasanaethau newydd wrth geisio elw a thwf.
Grŵp sy’n ystadegol yn llai tebygol o fynychu prifysgol:
yn cynnwys; Myfyrwyr anabl; Myfyrwyr â chyflwr iechyd meddwl; Myfyrwyr niwroamrywiol (er enghraifft, awtistiaeth, dyslecsia, dyspracsia, anhwylder diffyg canolbwyntio a gorfywiogrwydd (ADHD); Myfyrwyr sydd wedi ymddieithrio oddi wrth eu teuluoedd; Myfyrwyr sydd â phrofiad o ofal; Myfyrwyr o gefndiroedd Du, Asiaidd neu leiafrifoedd ethnig; Myfyrwyr â chyfrifoldebau gofalu, gan gynnwys cyfrifoldebau rhieni; Myfyrwyr sy’n ffoaduriaid neu’n geiswyr lloches; Myfyrwyr o ardal ddifreintiedig; Myfyrwyr o ardal lle mae cyfranogiad AU yn isel; Myfyrwyr o deuluoedd incwm isel; Myfyrwyr sydd gyntaf yn eu teulu i fynychu prifysgol; Myfyrwyr sy’n nodi eu bod yn LHDTC+; Myfyrwyr o gefndiroedd Sipsiwn neu Deithwyr.
Grwpiau heb gynrychiolaeth ddigonol:
Mae grwpiau heb gynrychiolaeth ddigonol yn cynnwys unigolion sy’n cael eu tangynrychioli yn y gweithle neu mewn addysg uwch, fel lleiafrifoedd ethnig, menywod, pobl ag anableddau, a’r rhai o gefndiroedd economaidd-gymdeithasol is.
Gwaith Gwirfoddol:
Mae gwaith gwirfoddol yn cyfeirio at rolau di-dâl a gyflawnir er budd eraill. Mae’n aml yn gysylltiedig ag elusennau neu sefydliadau dielw ac mae’n darparu profiad gwerthfawr a datblygiad sgiliau.
Gwasanaethau Cefnogi Myfyrwyr:
Mae gwasanaethau cymorth i fyfyrwyr yn cwmpasu amrywiaeth o adnoddau a gwasanaethau sydd ar gael i gefnogi myfyrwyr ar hyd eu taith academaidd. Gall y rhain gynnwys cymorth academaidd, cyngor gyrfa, a gwasanaethau iechyd meddwl.
Menter Gymdeithasol:
Mae mentrau cymdeithasol yn fusnesau sy’n ceisio gwella materion cymdeithasol neu amgylcheddol. Er eu bod yn cynhyrchu elw, mae cyfran sylweddol o’r enillion hyn fel arfer yn cael eu hail-fuddsoddi i hyrwyddo eu cenhadaeth gymdeithasol.
Mentora:
Mae mentora yn cynnwys y gefnogaeth a ddarperir gan berson mwy profiadol i un llai profiadol. Mae mentoriaid yn helpu mentoreion i ddatblygu sgiliau, gwybodaeth a phrofiad, gan gynnig arweiniad a chyngor.
Recriwtio Cynhwysol:
Mae recriwtio cynhwysol yn cyfeirio at y broses deg a diduedd o recriwtio a dethol ymgeiswyr, gan sicrhau nad oes unrhyw wahaniaethu na rhagfarn. Ei nod yw denu talent amrywiol a chreu chwarae teg i bob ymgeisydd.
Rhwydweithio:
Rhwydweithio yw’r broses o feithrin perthnasoedd a chysylltiadau â gweithwyr proffesiynol eraill. Ei nod yw ehangu eich cysylltiadau proffesiynol, cael mewnwelediadau, a chael mynediad at gyfleoedd a chymorth gyrfa.
Sector Cyhoeddus:
Mae’r sector cyhoeddus yn cynnwys sefydliadau y mae’r llywodraeth neu awdurdodau lleol yn berchen arnynt ac yn eu gweithredu, er enghraifft. Mae’n cynnig cyfleoedd cyflogaeth mewn meysydd fel addysg, gofal iechyd, gorfodi’r gyfraith, a gwasanaethau cyhoeddus.
Sector Preifat:
Mae’r sector preifat yn cwmpasu busnesau a diwydiannau sy’n eiddo i unigolion neu gwmnïau preifat. Mae’n cael ei yrru gan elw, gan gynnig rolau sy’n amrywio o fusnesau bach i gorfforaethau rhyngwladol, byd-eang.
Symudedd Cymdeithasol:
Mae symudedd cymdeithasol yn cyfeirio at allu unigolion o gefndiroedd cymdeithasol-economaidd is i gael mynediad i addysg a chyflogaeth a gwneud cynnydd ynddynt, waeth beth fo’u cefndir neu eu hamgylchiadau.
Trydydd Sector:
Mae’r trydydd sector, a elwir hefyd yn sector gwirfoddol neu ddielw, yn cynnwys elusennau, sefydliadau dielw, a grwpiau gwirfoddol. Ei brif nod yw lles cymdeithasol yn hytrach nag elw.
Tuedd anymwybodol:
Mae tuedd anymwybodol yn cyfeirio at dueddiadau anfwriadol neu awtomatig y gall unigolion eu dal tuag at grwpiau penodol. Gall y rhagfarnau hyn ddylanwadu ar wneud penderfyniadau a chyfrannu at barhad anghydraddoldeb.