Mae’r defnydd o offer deallusrwydd artiffisial fel ChatGPT yn dod yn fwy cyffredin yng nghyd-destunau academaidd a proffesiynol. Dengys arolwg gan Cibyl o fis Mai 2023 sut y mae myfyrwyr ar draws y DU, gan gynnwys Cymru, yn defnyddio ChatGPT i’w cynorthwyo gyda’u hastudiaethau a cheisiadau swydd. Beth am fwrw golwg ar oblygiadau hyn i ti, a’r modd y mae’r defnydd o’r offer hwn yn esblygu mewn addysg a’r byd gwaith.
Defnyddio ChatGPT mewn cyd-destun academaidd
Yn ôl yr arolwg, mae 50% o fyfyrwyr yn defnyddio ChatGPT ar gyfer eu hastudiaethau. Maent yn ei ddefnyddio i wneud gwaith ymchwil (51%), cwblhau aseiniadau gwaith cwrs (47%), a hyd yn oed yn ystod arholiadau (31%). Mae myfyrwyr yn gweld ChatGPT yn neilltuol o ddefnyddiol i gyflymu’r broses ymchwilio ac er mwyn cynhyrchu pynciau trafod. Ochr arall hyn yw eu bod hefyd yn ymwybodol o’i gyfyngiadau a’i duedd achlysurol i fod yn anghywir.
Adroddiad Turnitin ar gynnwys a gynhyrchwyd gan ddeallusrwydd artiffisial
Mae ymchwil diweddar gan Turnitin, y platfform cyflwyno gwaith a gwirio llen ladrad yr wyt yn siŵr o fod yn gyfarwydd ag ef, yn gwella ein dealltwriaeth ymhellach. Mae eu canfyddiadau yn dangos o’r tua 200 miliwn o bapurau a gyflwynwyd, roedd mwy na 22 miliwn ag o leiaf 20% o’r cynnwys wedi ei gynhyrchu gan ddeallusrwydd artiffisial. Fe wnaeth offeryn canfod deallusrwydd artiffisial Trunitin, a lansiwyd ym mis Ebrill 2023, ganfod fod 11% o fyfyrwyr wedi cyflwyno gwaith o’r fath, gyda thua 3% o bapurau wedi eu ffurfio o 80% o gynnwys deallusrwydd artiffisial. Mae hyn yn dangos y defnydd cynyddol o ddeallusrwydd artiffisial mewn gwaith academaidd a’r heriau mae hyn yn ei gyflwyno.
Defnydd ChatGPT wrth wneud ceisiadau swyddi ac yn y broses recriwtio
Os wyt ti yng nghanol gwneud ceisiadau ar gyfer swyddi neu leoliadau, mae’n siŵr y bydd gennyt ddiddordeb mewn clywed fod bron i hanner myfyrwyr (47%) yn dweud y byddent yn defnyddio ChatGPT ar gyfer llenwi ffurflenni ceisiadau swyddi. Mae nifer hefyd yn fodlon i’w ddefnyddio ar wahanol adegau o’r broses recriwtio, gan gynnwys mewn profion ar-lein (39%), mewn cyfweliadau (37%) ac mewn canolfannau asesiad (38%). Mae’r tueddiad hwn yn dangos sut y mae myfyrwyr yn defnyddio offer deallusrwydd artiffisial i ymgodymu a phrosesau cymhleth ceisiadau swyddi.
Ond bydd yn ofalus! Mae canfyddiadau diweddar o’r Institute of Student Employers yn dangos fod dros 90% o geiswyr swyddi bellach yn defnyddio offer deallusrwydd artiffisial megis ChatGPT i wella eu ceisiadau swyddi. Gan fod mwy o ymgeiswyr yn defnyddio deallusrwydd artiffisial i fireinio’u CV a’u ceisiadau, mae’n anoddach i gyflogwyr wahaniaethu rhwng ymgeiswyr sy’n arwain yn ei dro at werthfawrogiad newydd o ddulliau asesu traddodiadol wyneb yn wyneb yn ystod y broses cyflogi.
Wrth i ddeallusrwydd artiffisial barhau i esblygu, bydd hi’n hanfodol i ti i wella dy sgiliau creiddiol megis cyfathrebu, meddwl yn feirniadol a dy allu rhyngbersonol. Mae’r sgiliau hyn yn dyngedfennol mewn cyfweliadau wyneb yn wyneb, lle mae’r modd yr wyt yn rhyngweithio yn gallu cael effaith sylweddol a dy helpu di i ymgysylltu a chyflogwyr posib. Felly, er bod deallusrwydd artiffisial yn gallu dy ganiatáu i greu cais da, paid dibynnu arno’n ormodol. Mae canolbwyntio ar gyfathrebu uniongyrchol ac arddangos dy bersonoliaeth yn ystod cyfweliadau yn gallu dy helpu i sefyll ar wahân i’r dorf mewn marchnad swyddi cystadleuol.
Barn myfyrwyr am ChatGPT
Roedd y mwyafrif o’r myfyrwyr a ofynnwyd yn gweld ChatGPT mewn modd cadarnhaol, gyda 55% yn dweud ei fod yn gwneud bywyd yn haws. Eto, mae yna ofidion ynghylch ei dueddiadau a chywirdeb y wybodaeth mae’n ei ddarparu. Yn ddigon diddorol, dywedodd 53% o’r myfyrwyr eu bod yn cefnogi rhyw fath o oruchwyliaeth neu reoleiddio o offer deallusrwydd artiffisial fel ChatGPT.
Mewnwelediadau demograffeg
Roedd yr arolwg yn cynnwys ymatebion o 647 o fyfyrwyr o wahanol brifysgolion y DU, yn cynnwys amryw o grwpiau demograffeg. Myfyrwyr yn eu blwyddyn olaf a myfyrwyr du oedd y rhai mwyaf tebygol i ddefnyddio ChatGPT. Er na amlinellwyd data penodol am Gymru, roedd myfyrwyr o brifysgolion Cymru wedi eu cynnwys, sy’n awgrymu defnydd helaeth o offer deallusrwydd artiffisial yng Nghymru.
Goblygiadau hyn oll i brifysgolion a chyflogwyr Cymru
Mae gan brifysgolion a chyflogwyr Cymru gyfle gwych i integreiddio deallusrwydd artiffisial ymhellach yn eu cwricwlwm a’u prosesau recriwtio. Drwy addasu dulliau dysgu i gynnwys cymwysterau deallusrwydd artiffisial a deall ei ddefnydd mewn ceisiadau swydd, fe allent baratoi myfyrwyr yn well ar gyfer gofynion newidiol y gweithlu.
Mae’r erthygl hon yn seiliedig ar arolygon diweddar Cibyl ac yr Institute of Student Employers, yn adlewyrchu ar y rôl sylweddol y mae ChatGPT yn ei gael ar addysg a chyflogaeth, gan ddangos ei fanteision a’r heriau a gyflwynir ganddo. Wrth i dirlun offer digidol esblygu, mae deall eu heffaith yn hanfodol i raddedigion yn y sectorau addysgiadol a chyflogaeth.
