Os hoffet ti wybod mwy am y farchnad swyddi i fyfyrwyr prifysgol yn 2024, mae Ymchwil Graddedigion Cibyl 2024 a nifer o fewnwelediadau defnyddiol. Mae yna amrywiaeth o ffactorau i’w hystyried, wedi eu siapio gan bwysau economaidd, esblygiad dyheadau gyrfa a blaenoriaethau lleol, felly beth am gymryd golwg ar yr hyn sy’n digwydd.
Pwysau economaidd a disgwyliadau cyflog
Mae’r argyfwng costau byw wedi bwrw myfyrwyr ar draws y DU yn yr un modd a phawb arall, gan eu gwthio i ystyried disgwyliadau cyflog fwyfwy. Ar ôl naid sylweddol o 15% yn 2023, mae pethau wedi distewi i raddau yn 2024, ond mae dal disgwyliadau uchel. Mae hyn yn dangos fod graddedigion yn blaenoriaethu sicrwydd ariannol wrth ddewis eu gyrfaoedd, sy’n gwneud synnwyr o ystyried yr heriau economaidd y mae pawb yn eu hwynebu.
Rhagolwg ar y farchnad swyddi a hyder myfyrwyr
Mae dau draean o’r myfyrwyr prifysgol wnaeth ymateb i’r arolwg yn credu y bydd canfod swydd eleni yn anodd, yn enwedig rheini yn eu blwyddyn olaf. Mae’r pryder cynyddol hwn yn adlewyrchu pa mor gystadleuol yw’r farchnad swyddi ac o bosib y bwlch sy’n bodoli rhwng sgiliau myfyrwyr a gofynion cyflogwyr. Y newyddion da yw bod myfyrwyr fel ti yng Nghymru yn dangos mwy o optimistiaeth ynghylch eu cyfleoedd gyrfa graddedig o gymharu â’u cyd-fyfyrwyr yng ngweddill y DU, yn enwedig y rheiny sydd yn eu blwyddyn gynderfynol.
Blaenoriaethau sector
Er bod yna gwymp mewn diddordeb wedi bod yn ddiweddar, mae technoleg dal yn un o’r sectorau mwyaf poblogaidd ymysg myfyrwyr y DU. Mae’r diddordeb parhaus hwn yn dangos fod technoleg yn cael ei weld fel sector a photensial mawr i dyfu ac i arloesi, er yr heriau mae myfyrwyr yn eu hwynebu i ateb y gofynion technegol y diwydiant. Gall mynd i’r afael a’r bylchau hyder hyn fod yn allweddol i wireddu potensial llawn y farchnad swyddi technolegol felly siarada gyda dy Dîm Cyflogadwyedd os hoffet ti ganfod mwy o wybodaeth.
Cynllunio gyrfa gynnar a blaenoriaethau daearyddol
Mae bron i hanner (46%) o’r myfyrwyr blwyddyn gyntaf a ofynnwyd heb ddechrau meddwl am eu gyrfaoedd graddedig eto, sy’n dangos angen ar gyfer cymorth a chynllunio gyrfaol cynt. O ran lle yr hoffent weithio, Llundain yw’r dewis mwyaf poblogaidd o hyd, gan bwysleisio rôl y ddinas fel hwb ar gyfer cyfleoedd graddedigion. Ar y llaw arall, mae myfyrwyr yng Nghymru yn fwy tebygol o fod yn fodlon i symud o gwmpas ac ystyried cyfleoedd ar draws y DU, eto mae yna nifer sylweddol sydd eisiau aros yng Nghymru.
Addasu i dirlun newidiol
Wrth i fyfyrwyr y DU lywio’u ffordd drwy farchnad swyddi sydd yn cael ei siapio gan gyfyngiadau economaidd, gwahaniaethau lleol a newidiadau mewn gwahanol sectorau, mae’r angen ar gyfer cymorth a chyfarwyddyd gyrfaol cryf yn fwy pwysig nac erioed. Mae prifysgolion a gwasanaethau cyflogadwyedd a gyrfaol yng Nghymru yn addasu, gan gynnig cymorth wedi ei dargedu i helpu myfyrwyr fel ti i adeiladu sgiliau, hybu hyder ac i aros yn ymwybodol o gyfleoedd, gan sicrhau eu bod yn ddigon parod i fod yn rhan o farchnad swyddi cystadleuol. Mae’r e-Hwb yn enghraifft dda o sut y mae prifysgolion Cymru yn dod ynghyd i helpu eu myfyrwyr a darparu cymorth ychwanegol.
——————————————————————————————————————
Mae’r erthygl hon yn defnyddio’r tueddiadau a’r ystadegau diweddaraf o Ymchwil Graddedigion 2024 Cibyl i ddarparu trosolwg treiddgar o’r heriau a chyfleoedd sy’n wynebu myfyrwyr prifysgol y DU yn 2024. Mae deall yr agweddau hyn yn hanfodol i randdeiliaid ar draws y sectorau addysg a swyddi i wella cymorth i fyfyrwyr wrth iddynt wneud penderfyniadau addysgedig ynghylch eu gyrfaoedd.
